O BOE publica os motivos polos que o Ministerio rexeita ambientalmente o macroproxecto eólico PEol-922 AC, sinalando impactos sobre a biodiversidade, os recursos hídricos, o patrimonio cultural e a poboación.
Este 12 de outubro de 2026, o Boletín Oficial do Estado publica a Declaración de Impacto Ambiental (DIA) desfavorable do macroproxecto eólico Alamoceiros, Chamarrapio e Xubrintas, con parte da súa infraestrutura de evacuación, que afectaba os concellos de A Estrada, Campo Lameiro, Cerdedo-Cotobade, A Lama, Fornelos de Montes e Covelo.
O pasado 21 de setembro, desde Terra de Montes en Perigo informabamos desta resolución, daquela aínda sen publicar. Agora, coa DIA íntegra dispoñible, coñecemos os argumentos que fundamentan a decisión do Ministerio para a Transición Ecolóxica e o Reto Demográfico.
Que motivos levaron á DIA desfavorable?
A resolución identifica importantes deficiencias e afeccións ambientais que persistían mesmo despois de que os promotores reducisen o proxecto inicial de 40 aeroxeradores operativos a 25.
Entre as cuestións máis relevantes destacan:
- Biodiversidade e fauna protexida. Persistían aeroxeradores en localizacións consideradas de elevada vulnerabilidade para as aves, deficiencias nos estudos de fauna e insuficiente avaliación dos riscos para aves, morcegos e outros animais.
- Auga, humidais e hábitats naturais. A documentación non permitía avaliar adecuadamente as afeccións sobre determinados humidais, vexetación de ribeira e hábitats de interese comunitario. Parte da infraestrutura eléctrica atravesaba a zona protexida da Rede Natura 2000 do río Tea, sen que os promotores asumisen o soterramento solicitado pola Dirección Xeral de Patrimonio Natural da Xunta.
- Patrimonio cultural. A Dirección Xeral de Patrimonio Cultural da Xunta emitiu informes desfavorables sobre os tres parques e as súas infraestruturas de evacuación. Entre as afeccións identificadas destacan diversos xacementos arqueolóxicos, contornos de protección patrimonial e a Rapa das Bestas de Sabucedo, declarada Ben de Interese Cultural.
- Poboación e saúde pública. A Dirección Xeral de Saúde Pública sinalou deficiencias nos estudos de ruído e de parpadeo de sombras, que impedían validar as conclusións presentadas polos promotores.
- Impactos acumulativos e sinérxicos. O Ministerio constatou que non se avaliaran adecuadamente os efectos conxuntos das instalacións eólicas existentes e proxectadas no territorio, nin se atenderan os requirimentos de información complementaria neste ámbito.
Os propios promotores recoñeceron a perda de viabilidade do proxecto
Un dos aspectos máis significativos da resolución é que, ante as modificacións adicionais requiridas para reducir as afeccións ambientais e patrimoniais, os propios promotores concluíron que os parques resultantes perdían a súa viabilidade técnica e económica, ao non poder asumir os custos das infraestruturas de evacuación.
En consecuencia, non actualizaron o estudo de impacto ambiental, non asumiron as novas modificacións e medidas solicitadas e non achegaron a documentación adicional requirida.
O órgano ambiental conclúe que non quedou acreditada a viabilidade ambiental do proxecto e que as medidas propostas non ofrecían garantías suficientes para previr, corrixir ou compensar os seus impactos negativos significativos.
A importancia de participar e presentar alegacións
A propia resolución recolle as alegacións presentadas durante a información pública por comunidades de montes, asociacións e outras entidades, entre elas a Asociación Veciñal Sociocultural Ambiental Alarma na Terra de Montes.
Desde Terra de Montes en Perigo queremos agradecer unha vez máis o traballo de todas as persoas e colectivos que estudaron a documentación, advertiron das posibles afeccións e participaron neste procedemento.
A publicación íntegra da DIA permite agora comprobar que numerosas preocupacións ambientais e territoriais formuladas durante a tramitación tamén aparecen reflectidas nos informes dos organismos competentes e na análise final do Ministerio.
Esta DIA desfavorable supón un pronunciamento ambiental decisivo sobre o macroproxecto tal e como foi sometido a avaliación, aínda que a resolución final do procedemento de autorización corresponde ao órgano substantivo.
A defensa do territorio require información, traballo colectivo, rigor e participación. Esta resolución volve poñer de manifesto a importancia de analizar os proxectos e facer chegar as preocupacións da veciñanza aos procedementos públicos.
📄 Adxuntamos a Declaración de Impacto Ambiental íntegra, publicada no BOE do 12 de outubro de 2026, para a súa consulta.
